Япон Улсын Ното хойгийн газар хөдлөлт

Өнөөгийн байдал, хохирлын хэмжээ: Ното хойгийн газар хөдлөлт болсноос хойш 8 хоног өнгөрсөн 1 дүгээр сарын 9-ний өдрийн 10:30 цагийн байдлаар Ишикава мужид 180 хүн нас барсан нь тогтоогдсон бөгөөд тээвэр, холбооны сүлжээ бүрэн сэргээгүй тул хохирлын хэмжээ одоог хүртэл бүрэн тодорхой болоогүй хэвээр байна. Сураггүй алга бологсдыг эрж хайх, шаардлагатай бараа, үйлчилгээг хүргэх зам харилцааг сэргээн засварлах ажлууд тасралтгүй хийгдэж байна. Нас барагсдын тоог хотоор нь авч үзвэл Важима хотод 81 хүн, Сүзү хотод 71 хүн, Нанао хотод 5 хүн, Анамизү хотод 18 хүн, Ното хотод 2 хүн, Шика хотод 2 хүн Хакүи хотод 1 хүн тус тус байна. Түүнчлэн сураггүй болсон гэж нэр, насыг нь зарлаж, мэдээлэл өгөхийг нийтээс хүсээд байгаа 120 хүн байгаагийн дотор Монгол Улсын иргэн байхгүй байна гэж Япон дахь Монгол Улсын Элчин Сайдын Яамнаас мэдэгдэл гаргалаа.